السكن في الغربة: دليل الشابات السودانيات لاختيار سكن آمن ونظيف
✍️ بقلم: سهى| من بريد القراء
أنا سهى، شابة سودانية طموحة، قررت أسافر للدراسة والعمل.
قبل السفر بشهر كامل، كنت حايمة بين تطبيقات الحجز (Booking) و (Airbnb). بفتش عن سكن يجمع بين “الفخامة” و”السعر المعقول”، والأهم: الأمان.
بعد بحث طويل، عيوني وقعت على شقة في “كومباوند” فخم. الصور كانت بتتكلم! أثاث مودرن، ألوان هادية، مطبخ مجهز، وبلكونة بتطل على مسبح ونخل.
مكتوب في الوصف: “هدوء تام، عمال نظافة، وأمن 24 ساعة”. السعر كان شوية غالي، بس قلت في نفسي: “يا بت اشتري راحتك وأمانك، دي غربة”.
وصلت لوجهتي بالسلامة، ركبت التاكسي وقلبي بيرقص من الفرحة خلاص حاستقر في المكان “العاجبني”.
أخيرا” وصلت العنوان.. وهنا كانت الصدمة!
الكومباوند فعلاً موجود، لكن الصور الكانت في التطبيق الواضح إنها اتاخدت قبل 10 سنوات أو من شقة تانية خالص.
المسبح والنخل؟ طلع حفرة فاضية فيها شوية موية ملوثة وأكياس زبالة.
الأثاث المودرن؟ الكنبة مكسورة وعليها ملاية قديمة، والسرير بيعمل صوت مزعج مع أي حركة.
عمال النظافة؟ الغبار مالي المكان، والمطبخ فيه ريحة رطوبة و”صراصير” صغيرة بتتحاوم بحرية.
الأمان؟ البوابة الرئيسية كانت فاتحة وأي زول بيدخل ويطلع، وما في أي أثر للأمن الـ 24 ساعة.
قعدت في نص الصالة، شنطي حولي، وبقيت أعاين للمكان بذهول ودموعي خلاص قربت تنزل. كنت حاسة إني “اتغشيت” غشة العمر، وإني في مكان ما بيشبهني ولا بيشبه توقعاتي.
اضطريت أقضي الليلة الأولى وأنا خايفة وقرفانة، وتاني يوم بديت رحلة بحث جديدة ومتعبة جداً في الشوارع، لحدي ما لقيت سكن حقيقي بيشبه افكاري.
يا بنات..
السكن هو أساس الراحة في الغربة، وخصوصاً لينا كبنات، عشان كدة ختو النقاط دي في بالكم قبل ما تحجزوا:
- ما تعتمدي على الصور بس: الصور ممكن تكون قديمة، معدلة بالفوتوشوب، أو من شقة تانية.
- شوفي التقييمات (Reviews) بذكاء: أوعك تحجزي مكان ما فيه تقييمات حديثة (أقل من شهر). فتشي عن تقييمات بتتكلم عن الأمان، النظافة، والمضيف، ويفضل لو التقييمات من بنات تانيين.
- اتأكدي من الموقع الجغرافي: افتحي الخريطة وشوفي مكان الشقة وين. هل قريبة من المواصلات؟ هل هي في منطقة سكنية هادية ولا في نص سوق وزحمة؟
- اتواصلي مع المضيف مباشرة: قبل الدفع، اسألي أسئلة محددة عن الحاجات البتهمك (النظافة، الأمان، الجيران، هل في مصعد؟).
عموما” أنا من يومها، بقيت ما بصدق أي صورة في النت، وبقيت أقول لأي بنت مسافرة:
“ما تشتري السمك في الموية.. اتأكدي من الواقع قبل ما تدفعي!”