حرف واحد قد يكلفك رحلتك! قصتي مع غلطة البيانات في التأشيرة الإلكترونية.
✍️ بقلم: مازن | من بريد القراء
أخوكم، عامل فيها زول “تفتيحة” وبحب يخلص أموره بيده.
قدمت لتأشيرة سياحية أونلاين، والموضوع كان ساهل شديد: رفعت الصورة، مليت البيانات، ودفعت بالبطاقة. انتهى!
بعد كم يوم بس، جاني الإيميل المنتظر:
“Your Visa has been Approved“.
ما كنت مصدق وفرحان شديد شلت التلفون وبقيت أوري التأشيرة لأصحابي وللناس كلها.
وعلى طول جهزت باقي اموري وشنطتي أصلا” كانت جاهزة من قبل التأشيرة.
لكن يا فرحة ما تمت!
يوم السفر وصلت المطار بدددري ، اظن أول زول، مشيت لـ “الكاونتر” بابتسامة عريضة اديت الموظف الجواز والتأشيرة المطبوعة.
الموظف عاين للجواز، وعاين للتأشيرة.. وعاين لي أنا. وبدأ يكتب في الكيبورد ويمسح، ويكتب ويمسح. قلبي بدأ يدق، وفي سري قلت: “يا ربي في شنو؟”.
قال لي بهدوء: “يا أستاذ مازن، اسمك في الجواز مكتوب بـ (Double E) لكن في التأشيرة كاتبه بـ (I) بس؟”
ضحكت ببرود وقلت ليه: “يا زول ما بتفرق، هو نفس الاسم والنطق واحد، الحروف دي شكلية بس”.
الموظف عاين لي بشفقة وقال لي: “عندنا في السيستم ما شكلية..
السيستم ما بيعرف النطق، بيعرف المطابقة الحرفية. للأسف ما بقدر أطلعك الطيارة بالتأشيرة دي”.
الدنيا لفت بي. حرف واحد؟ حرف واحد يضيع عليّ التذكرة والحجز والرحلة؟ حاولت أقنعه، حاولت أشرح ليه إنه دي غلطة “كيبورد”، لكن القانون قانون. الطيارة قامت، وأنا بقيت واقف في نص المطار بعاين للناس المسافرة وبتحسر على “الحرف الطاير”.
الخسارة كانت حارة، واضطريت أقدم من جديد وأدفع رسوم تانية، والأهم من كدة إني اتعلمت درس عمري ما حأنساه.
غلطة الحرف أو الرقم في التأشيرة الإلكترونية (E-Visa) معناها “تأشيرة غير صالحة”. عشان كدة قبل ما تضغط “ارسال” (Submit)، راجع الحاجات دي:
- المطابقة الحرفية: اسمك لازم يتكتب بالإنجليزية زي ما مكتوب في الجواز بالظبط، حتى لو كنت شايف إنه مكتوب غلط في الجواز، التزم بـ “غلط الجواز” عشان السيستم يطابقهم.
- رقم الجواز: اتأكد من الأصفار والارقام (مثلاً الفرق بين حرف O ورقم 0)، لأنو أي رقم غلط بيخلي التأشيرة ما تظهر في نظام المطار.
- تاريخ الميلاد والصلاحية: راجع التواريخ مرتين، وتأكد إنك اخترت “السنة” الصح من القائمة.
- المراجعة النهائية: بعد ما التأشيرة تطلع وتوصلك في الإيميل، ما تفرح وتطبعها بس؛ اقراها حرف حرف وقارنها بالجواز. لو لقيت غلط، راسل الجهة فوراً قبل ما تمشي المطار.
نصيحة مني ما تستعجل في ملى البيانات، وخليك دقيق، لأنو المطار ما فيه “معلش” ولا فيه “النطق واحد”.